A spin-off da Universidade da Coruña (UDC) Indestia (Idea Emerxente), a compañía Casa Grande de Xanceda (Selo de Calidade) e o grupo SING da UVigo (Grupos de Investigación) resultaron elixidos gañadores polo xurado da VI edición dos Premios Spin-Off PuntoGal, que se reuniu a semana pasada en Santiago de Compostela.
O elevado nivel das máis de 15 candidaturas que se presentaron a estes galardóns fixo complicada a tarefa do xurado nunha nova edición dun certame que organizan o dominio PuntoGal e GCiencia e que contan coa colaboración da Secretaría Xeral de Universidades da Xunta e da empresa Gadis.
O xurado acordou por unanimidade a concesión de cada un dos premios aínda que houbo un longo debate en cada categoría. Entre os obxectivos do certame figuran recoñecer a transferencia de coñecemento entre a Universidade e a Empresa e alentar o emprendemento que xorde desde os grupos de investigación universitarios, así como premiar o uso de galego na empresa e a presenza das mulleres nas empresas e grupos de investigación.
Na categoría de Idea Emerxente, que premia a empresas de recente creación ou que levaran ao mercado unha idea innovadora en tempos recentes, foi elixida como gañadora a spin-off da UDC Indestia. O xurado destacou a posta en marcha dunha idea orixinal dentro do sector das TIC e conseguir clientes importantes para o seu producto PhotoIlike, unha ferramenta baseada na Inteligencia Artificial que permite seleccionar as fotos que van ter maior impacto entre o público, con aplicación polo de agora ao sector inmobiliario.
Ademais, o xurado decidiu conceder a distinción de finalista nesta categoría a Diversa, unha empresa recentemente posta en marcha por investigadores do IDIS de Santiago e que aposta pola comercialización de nanomedicamentos, cunha forte compoñente de I+D na súa base. O xurado destacou especialmente o seu potencial de desenvolvemento nos próximos anos.
Na categoría de Selo de Calidade o xurado elixiu como gañadora a candidatura de Casa Grande de Xanceda pola súa traxectoria de case medio século no rural galego e o seu compromiso co medio ambiente, o coidado dos animais e diversas causas sociais, entre elas o seu traballo para dar visibilidade ao papel da muller no rural. Ademais destacouse a calidade dos seus produtos que contan cun selo ecolóxico e que poden atoparse en moitos puntos de España.
Grupos de investigación
Finalmente, na categoría de Grupos de Investigación resultou gañadora a candidatura do grupo SING (Sistemas Informáticos de Nova Xeración), adscrito á UVigo e que desenvolve a súa actividade no campus de Ourense. O xurado destacou como méritos da súa proposta a sólida traxectoria no campo da investigación biomédica e a ciberseguridade, con proxectos destacados mesmo no ámbito estatal. Ademais, tívose en conta a importante presenza de mulleres entre o seu corpo de investigadores.
Os integrantes do xurado son as investigadoras María Xosé Malmierca, Edita de Lorenzo, Andrea Muras e Sonia Martínez Arca, o representante da Secretaría Xeral de Universidades, Faustino Infante Roura, e a CEO da empresa Galchimia, Carme Pampín. O acto de entrega dos premios terá lugar en Vigo nas próximas semanas e contará coa presenza de destacados representantes institucionais, académicos e empresariais.
En anteriores edicións destes galardóns xa foron premiadas empresas consolidadas e de longa traxectoria como Innolact ou Mestrelab xunto a outras que achegaron innovacións importantes ao tecido empresarial galego como Situm ou All Genetics. Tamén resultaron premiados grupos de investigación como VARPA ou Laboratorio de Bases de Datos.
